أكتوبر 23, 2020

ألو أمي كيفكن بالبيت؟

ما تزرعوا الحقد والكره بقلب ولادكن

أنا: آلو أمي كيفكن بالبيت؟

أمي: مناح بالشكل بس القلوب ناطرها غمرتك كل تكّة…

أنا: الوطن عم يغلي رصاص وبخار البارود عم يخنق لبنان… صعبة وخطرة إنزل ع لبنان هالصيفية… كيف الحيّ؟ كيف الزواريب؟ كيفكن بهالليل…؟

أمي: با إبني…بعدها انطوانيت عم تزرع ورد عالسطيحة، وبتقلّي ع فنجان قهوة: لي بيزرع ورد وزهر بيآمن ببكرا… الزواريب فاضية من ولاد السبع طوابق والغميضة… سرقتن الاحزاب ليعبّو كياس رمل ع قصر الزعيم…والليل مبلول بدموع الموجوعين… ودموعن نجوم بهالعتمة… ورح يجي الوقت هالنجوم تعانق الفجر العم يحتلّ أحلامن…

ومن وقت لوقت عم نضّف قوضتك بلكي جيت مفاجأة، وع غفلة…ولاد خيّك وأختك شافوني عم نضّف القوضا صارو يرقصو من الفرحة… فكروك جايه من الغربة… رجعو قعدو عالدرج يتذكرو كيف كنت تلعب معن: أوقات يا أبني ما منعرف قيمة اللحظة إلا لمّا تصير ذكرى … ذكرى حلوة….ع فوقا! عاملة كم أكلة بتحبّن ومضبوبين بالتلاجة…ناطرين رجعتك بالسلامة….قبل ما إنسى! بونا طانيوس سألني عنك!

أنا: خليكي من وقت لوقت نضفّي قوضتي: الحنين بيمنعني إنسى طريق البيت… طبخاتك وضحكات ولاد أخوتي وخالتي وعمتي وعمومتي هنّي دفى من صقعة الغربة العم تنخر عضامي… هنّي فيّة برود ع كتف وادي من حريق ظلم هالدني…قولي يا أمي لأبونا طانيوس يضلّ يدق جرس الرعية وما يتعب دخيل الله… قوليلو يدقّ الجراس… وحدو رنين الاجراس بيوعّي لبنان من نومة تجّار مخدرات الفساد والذل… قوليلو يدقّ جراس الكنيسة؛ الجراس دعوة للحرية، للمحبة… كل مرّة بسمع صوت جرس كنيستنا برجع بتعمّد حب من جديد، وبرجع بصلّب إيدي ع وجّي وع لبنان جديد..

‫شاهد أيضًا‬

بيان مجلس المطارنة – شباط ٢٠٢٣

بيان مجلس المطارنة – شباط ٢٠٢٣ نهار الأربعاء 1 شباط 2023، عقد أصحاب السيادة المطارنة…