‫الرئيسية‬ قراءات روحية الأب بيتر حنا: هيدا الشب قريبًا رح يتطوّب، ومن بعدا رح يصير قديس.. شو حلو
‫‫‫‏‫3 أسابيع مضت‬

الأب بيتر حنا: هيدا الشب قريبًا رح يتطوّب، ومن بعدا رح يصير قديس.. شو حلو

الأب بيتر حنا

شباب صبايا،

هيدا الشب إسمو كارلو أكوتيس، توفى عمرو 15 سنة..

قريبًا رح يتطوّب، ومن بعدا رح يصير قديس..

قريبًا كمان، إمو رح تروح تقدس نهار الأحد بكنيسة عإسمو..
شو حلو..

من بعد 16 سنة على وفاتو، فتحو قبرو، ولقيوه متل ما هوي، جسمو بعدو هوي هوي..

السؤال، ليش الله عم يخصّو بهيك إكرام؟

كرمالو؟ لاء أكيد..

لأن هوي صار عندو فوق، وفوق بكرمو..

ولكن، كرمالكن..

كرمال كل شب وصبية، تيعطي رسالة إلكن، إنتو اللي عم تدورو عالفرح والنجاح..

إنتو اللي عم تدورو عالحقيقة..

هالشب عم يقول لكل واحد منكن: يسوع هو الحقيقة..

هالشب عم يقول لكل واحد منكن: القداسة مش صعبة..

ما تفكروه إنعزل أو عاش بعيد عن الناس..
أبدًا، عاش متلكن، عندو رفقات كتير، وكان يحب الكومبيوتر والانترنت..

حتى إنو عمل موقع إلكتروني لتكريم القربان المقدس..

يعني استغل التكنولوجيا للخير وللحب..

وكان يمسك مسبحتو ويصلي،

يا شباب ويا صبايا،

الله ما بدو منكن شي،

بدو يعطيكن ذاتو،

بدو يعبي قلوبكن حب وفرح حقيقي..

الله ما بدو ياكن تتبعوه،

بدو ياكن تعرفو إنو هوي دايمًا عم يتبعكن..

رح تتعرفو عكتير ناس، رح يحبوكن بس تكونو حلوين او ناجحين او متميزين..

بوقت من الاوقات، بس تتعبو، رح يفلو ويتركوكن..

الله ما بيترككن..

رح يبقى أمين على حبكن للأبد..

عيشو حياتكن متل ما هلق عايشينا،

ولكن سمحو ليسوع يكون صديق إلكن،

مسكو الموبايل، ولكن كمان خدو الوقت تتمسكو المسبحة..

عيشو عالأرض، ولكن كمان خدو الوقت تتطلعو عالسما..

كَفّو عم تعملو كل شي عم تعملوه، ولكن عملوه بحب..

سمحو لله يحول حياتكن لقصة قداسة..

هلق خدو قرار،

غمضو عيونكن،

صلبو إيدكن على وجكن،

وقولولو: يا رب، ساعدنا نعرفك ونحبك

ودغري رح تشعرو بحضورو..

انشالله يحميكن

وانشالله بتعملو جيش ينشر الحب بإسم يسوع بكل الأرض..

‫شاهد أيضًا‬

في الاقتداء بالمسيح واحتقار أباطيل العالم كلّها

الفصل الأول في الاقتداء بالمسيحواحتقار أباطيل العالم كلّها 1 – ” مَن يتبعني – يقول ال…