الأب فادي روحانا: الناس مش متخبايّه بتيابها، الناس متخبايّه بأوجاعها…

الأب فادي روحانا

ليه تركو بعضن؟

ليه عم يتعاطى مخدرات؟

ليه مثلي الجنس؟

ليه ما تزوجت حرام ؟

الناس مش متخبايّه بتيابها، الناس متخبايّه بأوجاعها…رح إتركها بسلام…

مش مهم ليه؟

لأنو لي صار، صار من ضعف، من خلل، من ظلم، من حظ، من سرّ… المهم قدّيه رح نحب… هالعالم ما بدّو رجمة بدّو رحمة… هالعالم ما بدّو حرب بدّو حبّ… الموجوع ما بدّو: يا حرام! بدّو سلام! سلام من لساننا لي بدين، من عيوننا لي بتميّز، من ضجرنا لي بيثرثر…

الحياة معركة في عسكر بيخسر فيها… في عسكري بعدو لهلق معطوب ومكمّل هالعمر عم يعرج… رح اضربلو التحية بسلام…

الحياة بتدق ع بابنا عالهدا الهدا ومش الكل بيسمع خبطاتها ليفتحلها الباب قبل ما تروح وما ترجع… لا هي عادلة ولا نحن سمّعين أوقات …الله يساعد الانسان.! تركوه بسلام… اذا ما فينا نحب، عالقليلة ما نسبّ… نسبّ الناس… إذا ما فينا نحب عالقليلة نبعد… إيه! نبعد بسلام… الحرق ما بيوجّع إلا صاحبو…خلونا نترك هالعالم بسلام… اذا ما فيك تعطي الدوا، عالقليلة ما تزيد البلا…

ليه صار هيك؟ ولا مرّة رح تعرف الحقيقة، لأنو الحقيقة هي أكبر إنك تعرفها… وإذا فكّرت حالك بتعرفها، الحقيقة بتبطّل حقيقة…

الله هوّي الحقيقة ومين بيسترجي يقول أنا بعرف كل الله؟

ويسوع قال: جيت لحب مش حتى دين الناس…

ليه صار هيك؟ بهالليلة فهمت إنّو في ناس بدّها حنيّة مش حشريّة… بدها غمرة مش وعظة…