‫الرئيسية‬ قراءات روحية الأب مجدي العلاوي: الحب مش كلمة، الحب روح، سمحوا لروح الحب يسكن قلوبكن، يتسلل على حواسكن يمليها من فيض حبه
أبريل 23, 2020

الأب مجدي العلاوي: الحب مش كلمة، الحب روح، سمحوا لروح الحب يسكن قلوبكن، يتسلل على حواسكن يمليها من فيض حبه

خادم جمعية سعادة السماء الأب مجدي العلاوي

انا اليوم على أرض الغربة وبكرا يمكن بحضن السماء.

انا اليوم عم بتنعم بخيرات الارض وبكرا هالخيرات بتزول.

انا اليوم إجريي عم ياخدوني وين ما بدي على المطارح يللي بحبها وبكرا هالمطارح باقية بس أنا وإنت وين منكون؟

شو قادر تعمل اليوم تيكون إلك بكرا؟ ونيال مين إلو بكرا !

حياتنا على الارض جسر عبور للسما ومين بيضمن السماء؟

السماء قريبة مني ومنك والمفتاح بإيدي وبإيدك وكلمة السر هي الحب وكيف بدك تحب؟

بدك تحب عدوك وتغفرله (يسوع غفر لصالبينه).

بدك تخدم خييك بتواضع (يسوع غسل أرجل تلاميذه).

بدك تقدم ذاتك ذبيحة حب (يسوع بذل ذاته على الصليب من أجل خلاصنا).

اعطي من قلبك لخييك الفقير يللي عم ينزف وكل لحظة في صرخة إستغاثة ،بلش بقلب بيتك وشوف جارك ويللي حواليك بلفتة منك قادر تمسع دمعة.

أولادي الحب مش كلمة، الحب روح… سمحوا لروح الحب يسكن قلوبكن يتسلل على حواسكن يمليها من فيض حبه.

سمحوا لروح الحب ينتشر بالعالم ويكون وباء معدي ينتشر بكل الكون ويملي الدني فرح ،خدمة وعطاء.

بإسم هالروح بدي إشكر كل إنسان تحلى بروح العطاء تاتجلت أعمال الخدمة والعطاء بجمعية سعادة السماء من خلالكن إنتو من روحكن قدمتوا والرب بروحه القدوس رح يظللكن ويبارك عطائكن وبالشكر بتدوم النعم،الله يقدسكن.

‫شاهد أيضًا‬

المطران عوده للبنانيين وخصوصاً المسيحيين: “لا تُهلِكوا أَنفـسكم من أجل زعيم كائِـنًا مَن كان”

أكّد متربوليت بيروت وتوابعها للروم الأرثوذكس المكران الياس عوده، في عظة الأحد أنّ “ك…