‫الرئيسية‬ قراءات روحية قراءات متفرقة الأب مجدي العلاوي: انا اليوم بعيديك يا امّي بقلّك…
مارس 21, 2019

الأب مجدي العلاوي: انا اليوم بعيديك يا امّي بقلّك…

الأب مجدي العلاّوي

المجد لله.
بعيديك يا إمي يا اطهر الإمهات ،كل الطوباوين ،المكرمين والقديسين وآباء الكنيسة التجوا لإلك وطلبوا شفاعتك،مار شربل ،رفقا والحرديني
القديس يوحنا بولس التاني قلك:”كلّي لك يا مريم”
انا اليوم بعيديك يا مريم بقلك كلي لإلك انا وعيلتي الصغيرة نجلا ،ماتيو،كريس، كريا،ماريا وعيلتي الكبيرة جمعية سعادة السماء متطوعين ،متطوعات ومحسنين،فريق عمل ،هيئة إدارية ومستفدين بقلك امسكينا بإيدينا اغمرينا بتوبك وكل عيد إم وإنتي معنا يا أحلى وأطهر إم….
لزوجتي بدي قول مش بس ٢١ آذار عيد الأم لان كل يوم معك في عيد إنتي يللي بتعرفي تضحي كل همك سعادة عيلتك وما بتفرقي بين الصبي والبنت. إيام كتيرة ما بتنامي وبشوف دموعك وبقلك شو بكي ؟؟ مابتغفى عينك إلا إذا كانوا ولادك نايمين ، بتفرحي على فرح ولادك وبتحزني على حزنن. إنتي قديسة بحبك الله يخليلي ياكي ويطول بعمرك. إمي يللي سبقتينا عالسما،يمكن بس يللي سبقون أهلن وعبروا عالسما بيحسوا بهالإحساس، يللي كل يوم بس كون تعبان بجي وبحط راسي عا صدرك وبس كون مبسوط حب اغمرك،وبس إنجح أركض تاخبرك عن نجاحي،وبس إفشل قلك ساعديني لأن عندك دايما بلاقي الحل لكل مشاكلي،لانك بتوثقي فينا وبتحبينا،وما بتدينينا،ما بتعييرينا وما بتشهري فينا لان نحنا مش قطعة من قلبك نحنا قلبك،بعرف لو كان في كاميرا بغرفة النوم كنت عرفت كم مرة بكيتي عا وجعنا،حزننا،وسخنا ،جروحاتنا على فشلنا …
إتكالك دايما على، العدرا ويسوع،
“ومن كان إبن للعذراء لن يدركه الفساد”
كنت إسمعك تقوليلي لو كمشت التراب يا إبني بيصير دهب..وانا ماسك اكتر من الدهب .
بدي إعتذر منك عن كل مرة بكيتك وجعتك،عن كل مرة ماسمعت كلمتك ويا ريتك بعدك عايشة كنت غسلتلك إجريكي وشربت زومن .
إترضي عليي من السما يا أحن وأطيب إم إشتقتلك.
-بدي عيد كل الإمهات المقهورين بالعالم،كل الإمهات يللي انظلموا ،يللي إبنن إستشهد،الأمهات يللي عندن ولد من ذوي الحاجات الخاصة ،كل الإمهات يللي عندن امراض وما عندن حق دواء ولا مال للعلاج بالمستشفى….
كل إم إبنها محبوس ،كل إم معنفة،كل أرملة ،كل إم ما معها مصاري تشتري حليب أو اكل لإبنها او تدفع آجار بيتها او مدرسة ،كل إم قسيت عليها الدني ….
بدي قلكن ينعاد عليكن يا اطيب إمهات.
_بدي قول لكل شخص بيقول حماتي لإم زوجها أو لإم الزوجة، لاء هيدي إمك وإمك ونشكر الله لأن عطانا إمهات إتنين ،بدي عايد إمي دلى الله يطول بعمرك ، إنتي يللي كنت متل العدرا وما ركعتي ، كنتي بكير أرملة ربيتي ولادك بدموع عينيكي وإتهجرتي بالحرب مع عيلتك وما استسلمتي وما ركعتي ،كنتي أول مدرسة بالناعمة وعلمتين التعليم الديني الصحيح ورافقتين وكبرتين وزوجتين وصار عندك أحفاد وبعدك حاملة الصليب بفرح ولا مرة قلتي إنك موجوعة، إنتي يللي جامعتينا على المحبة ودايما على اللقمة الطيبة من إيديكي والهيصة والرقص والأغاني،،
الله يخليلنا ياكي وكل عيد وإنتي بخير.
خادم جمعية سعادة السماء الأب مجدي العلاوي.

‫شاهد أيضًا‬

لبنان على درب الجلجلة… لكنّ القيامة قريبة!

إنّه الصّباح الثّالث بعد انفجار مرفأ بيروت. الصّباح الثّالث على المجزرة الّتي زلزلت العاصم…