قراءات متفرقة - أبريل 23, 2019

بالفيديو شهادة حياة: الهيرويين خرَبلي بيتي… وحتّى التلفزيون سرقتوا من بيت إهلي

جمعية سعادة السماء - ستيف صليبا

الهيرويين خلاني إسرق وأقتل …

يسوع شالني من عتمة القبور ووصلني لنور القيامة.

انا ستيف صليبا عمري ٢٧ سنة من ١٣ سنة عاشرت رفقة سوء وأبشع الأساليب تعاطيتها من دخان، حشيشة، كوكايين، هيرويين… قمار…

غرقت، غرقت ومش عارف شو بدي وكيف بدي إخلص….
الهيرويين خلاني إسرق، إنصب، إحتال، إديّن ما اوفي حتى التلفزيون سرقتوا من بيت إهلي…


إفلاس جسدي وروحي… حتى صديقتي بعد ٤ سنين تركتني فقدت الأمل مني…


إفلاس جر الإفلاس قرفت من حالي، من ريحتي… وقوست على قلبي بس ربي رحمني ورحم صلاة ومحبة إمي الواقفة معي رغم صليبها الكبير وبالرغم من هالشي ما تبت ولا أخدت العبرة من قيامتي من الموت…


كفيت طريقي صوب جهنم، ٣ سنين إتعاطى هيرويين…
٣ سنين هيرويين حبيت قارنن ب٣ إيام، آلام، موت وقيامة يسوع.
اول سنة بشبها بيوم الجمعة العظيمة مريم الواقفة عم تبكي إبنها الوحيد،أهلي مخنوقين من وجعن عليي وانا بتاني دني…
تاني سنة بشبها بيوم سبت النور تلاميذ يسوع إشتاقولوا وفكروا إنن خسروا،وانا أصحابي وأهلي إشتاقوا لستيف الإنسان المربى على تعاليم المسيح…


تالت سنة بشبها بيوم قيامة يسوع من الموت وبهالسنة انا قمت من الموت بفضل شخص عزيز كتير عا قلبي وجميله كبير عليي، حبني بضعفي ووجعي أبونا مجدي العلاوي لولاه كنت بالقبر او بالحبس….
قبل ٣ إيام من إنتقالي على قرية الإنسان كنت كتير معصب ومعي كمية كبيرة من الهرويين أخدتن كلن وعملت بلاك اوت وما بذكر إلا إمي الواقفة فوقي وعم تذرف دموعها وانا بالأرض عم بختنق…


تاني نهار وعيت الصبح متل العادي وقلتلها لإمي عطيني مصاري وقالتلي يا إمي مش ذاكر شو صار معك مبارح وشو قلتلي؟
قلتلها ما بيهمني بدي مصاري هلق!


قالتلي مبارح إنت وعم تختنق بالأرض بين إيديي قلتلي”ما تتركيني يا ماما انا كتير موجوع”.


وبهاللحظة كإن دلو مي سخنة إندلق عليي وكانت لحظة التغيير ….
القيامة بتمناها لكل إنسان مدمن لاني دقت طعم المرارة والبعد عن يسوع…


بدي وجه رسالة لكل مدمن وبدي أشكر ابونا مارتن عيد لأن سعي معي توصل هالرسالة ومش بس المدمنين على المخدرات ،المدمنين على إشياء كتيرة ،بأنو الحياة حلوة وما نتعلق بالأرضيات،اناكنت مفكر إنو لازم إتعاطى تكون مبسوط بمشاهدة فيلم سينما او بأي عمل بقوم في بحياتي.


بدي قول لكل إنسان عايش هالبلوة رجاع ليسوع صلي، صلي وكمان صلي.


بقرية الإنسان عشت وإختبرت نعمة الصلاة الدايمة.


كنت حط الحق دايما على يسوع وقلو وينك يا يسوع إنت قادر عمول شي ، وينك يا مار شربل ناطر أعجوبة ملموسة ومنظورة…


بس اليوم العجيبة تحققت وهالآية من الإنجيل رح تبقى راسخة فيي “طوبى لمن آمن ولم يرى.”


المسيح قام حقا قام.


شهادة حياة ستيف صليبا من كنيسة القديسة تريزا الطفل يسوع سهيلة.