رسالة من جيلبير الى عروسة فوج إطفاء بيروت… كل ما قرّب العيد عم اتخزّق من جوّا اكتر!

نشر جيلبير قرعان خطيب “عروسة فوج اطفاء بيروت” سحر فارس فيديو لخطيبته.

بعد 4 أشهر على انفجار مرفأ بيروت، نشر جيلبير قرعان خطيب “عروسة فوج اطفاء بيروت” سحر فارس فيديو لخطيبته وعلّق عليه بالقول: “اسمر اللون وعيونو السود، يا عروستي البطلة الحلوة اليوم بيصير الك ٤ شهور غايبي عنّي ، ١٢٠ يوم صرلي ما شفتك ولا سمعت صوتك ولا حسيت بحنيّتك ، ٤ شهور كأنن ٤ سنين يا روح قلبي انت ، لا عقلي قادر يصدّق انك فليّتي ولا قلبي عم يستوعب غيابك ، انت معي بكل ثانية و بكل خطوة ، انت بقلبي و بعقلي كل تكّة ، عم بحكيكي كل ثانية لانك معي بعدك الفرق بس مش عم تردّي عليي ، بس انت بطلة والابطال ما بتموت ، انت ما كان بدك تموتي ، انت كان بدك نعيش سوا ، نفرح سوا ، نعمّر بيتنا سوا ، نكبر سوا ، نتزوج و نبني عيلة سوا ، نختيّر سوا انت رحتي و المجرمين ضلّو ، كوني معي واعطيني القوة حتى المجرمين يلي عملوا فينا هيك ياخدو حسابن عالارض قبل حسابن بالسما.

كل ما قرّب العيد عم اتخزّق من جوّا اكتر يا سوسو ، وين يلي كنت من اول الشهر بلش دورّلو شو بدي جبلو هدايا ، وين يلي كنا ننطر نشوف شجرة الميلاد والمغارة ، وين يلي بدي قلّو بدنا نعيّد مع اهلك وانت تقوليلي لا مع اهلك انت، العيد هالسنة غير ، الو طعمة غير ، بدنا نستقبل يسوع بغصة و حزن لانك غايبي بالجسد بس عيدك بالسما اجمل بكتير و حنصلّي نحنا و ياكي بليلة العيد و نستقبل يسوع”.

وتابع: “عيوني اشتاقو يلمحوكي لمحة يا سحر دينيّي مشتاقين يسمعوا اسمي بصوتك الحلو اشتقتلك كتير … كتير يا عمري. نيالك بالسما ونيال السما فيكي يا اجمل ملاك مرافقني بحبك كتير كتير كتير وعم حبك اكتر كل يوم يا عيون جيلبير وقلب جلبير و حياة جيلبير انت وعدي الك متل مكنتي شايفي حالك فيني ومتل مكنّا شخص واحد و روح وحدة، انو ضل متل ما عيونك بدها وتضلك شايفي حالك فيني من السما حتى نرجع نلتقى شي يوم ونكفي سوا”.

لمشاهدة الفيديو