عبالي قلّك ” لاء ” البابا والماما ما فَلّوا، عندن شغل بس شوي وراجعين

” ٢٦ آب ٢٠٢١ ”

يا ريت إيديي مطرح هال t-shirt، ت أُغمرِك وإدفى أنا، تَقِلّك ” لاء ” البابا والماما ما فَلّوا، عندن شغل بس شوي وراجعين.

يا ريت اللي حَطّك بكيس وكَبّك هونيك وهَرَب، بيِرجَع… ما بدنا نحاسبو ولا نْسِبو ولا شي، خلّي يِرجَع وياخدِك كِرمالِك، كِرمال البُكرا تَبَعِك، كِرمال تكون سنينك دافية، كِرمال ما توعي بنهار ويخبروكي حقيقة بشعة صارت ب ٢٦ آب ٢٠٢١.

خَلّي يِرجَع ونحنا قدّامو وورا شو ما يعوز، المهّم يضَل حَدّك يا صغيرة.

محروق قلبي عليكي، عَ ليش بدّا تُخلَص حياتِك بالنهار اللي بلّشت في.

محروق قلبي عَ الوَجع اللي ناطرِك تِكبَري تَيطُلّ عليكي ويرافقِك وما يحِلّ.

محروق قلبي عَ كمّية الحلى بِ صورتك وعَ كمّية البشاعة بِ سَبَبها.

سامحينا لأنو ما عرِفنا نِتعَب عَ مجتمع تَ يكون سليم ونضيف وصُحّي، ما قدرنا نقَلّل الجريمة والغلط، ما قدرنا نِشتِغل عَ جيل واعي، ونفسياً مرتاح.

مطرحِك إنتي بالطفولة والفرح.

جوني مخيبر

Cr: PoliticalPEN