ديسمبر 1, 2020

فتنا بشهر العيد… وكل يلي كتبتو رح يصير، رح يصير فوق بالسما، لما نلتقي…

لارا نون

فتنا بشهر العيد… وهالشاب الحلو والمليح… وعيونو عسلية… لابس معطف البرد… وعم يشتغل عالمرفأ… ناطر ال weekend ليطلع عالضيعة يبوس إيد إمو وجبينا… ويرجع عشغلو…
فتنا بشهر العيد… وجو نون عم يحضّر بالضيعة احتفالات عيد الميلاد والزينة والقداديس… وداير الشبيبة كلها… قرّب العيد…
فتنا بشهر العيد… وسَحَر مع خطيبا عم يجهزو بيتن… وزينة البيت… يلّي رح ينسكن بعد كم شهر… والشمعة مضواية كل يوم حد تمثال العدرا…
فتنا بشهر العيد… وجو عقيقي بالضيعة فوق… مكَنكن حد أهلو ورفاقو… ناطر موسم التلج… معبى البيت والدني… كل الدني…
فتنا بشهر العيد… ورالف اشترى كنزة حمرا للكلب تبعو… هيدا الكلب يلي ما نسي… هيدا الكلب يلي ما وقف بكي… من كتر البكي…
فتنا بشهر العيد… وشربل ونجيب حتي فوق بقرطبا… عم يحضرو البيت لجَمعة عيد الميلاد… هالجَمعة يلي ما ممكن تنقص واحد… ولا تنين…
فتنا بشهر العيد… وألكساندرا بلشت تروح عالمدرسة… وعم تكتب لبابا نويل شو بدا هدية ليلة الميلاد…
فتنا بشهر العيد… وشربل كرم عم يركض تيجيب هدايا لولادو… قبل العجقات… قبل ما يسكر السير من كتر الناس بفترة الأعياد…
فتنا بشهر العيد… والطفلة يلي عم تتعالج من السرطان قاعدة مع والدها يلي إجا خصيصاً من افريقيا ليكون معها بهالفترة… ماسكة إيدو لتاخد قوة منو… بدا تقضي فترة العيد معو قبل ما يرجع يفل… قبل ما يتركا… ويفل…
فتنا بشهر العيد… وفرقيع ليلة راس السنة… ما رح يخوّف ولادنا… ما رح يركضو يتخبو تحت الطاولة…
فتنا بشهر العيد… وبعدو المرفأ ما تفجّر… بعدا الجريمة ما صابتنا بنص قلبنا… وبعدو الإجرام ما شلّع ارواحنا…
فتنا بشهر العيد… وكل يلي كتبتو رح يصير… رح يصير… فوق بالسما… لما نلتقي… بعهد جديد…
فتنا بشهر العيد… واجواق الملايكة يلي عم تعزف لحن السما… عم تزيد…
فتنا بشهر العيد… وكل ما الدني تشتي بكي… وكل ما غنية تحرق قلبنا من الغصة… وكل ما لمعة شجرة تستفز عتمة الحزن يلي فينا… شِدّو عإيدنا من فوق…
“طَيفكن معنا” يا أبطال… طيفكن معنا… منو بعيد…

‫شاهد أيضًا‬

بهذه الكلمات هنّأ البطريرك ساكو المسلمين بحلول شهر رمضان!

وجّه بطريرك بابل للكلدان الكاردينال لويس روفائيل ساكو التّهنئة إلى المسلمين بحلول شهر رمضا…