نوفمبر 27, 2020

لكِل أهل بَطَل من هالأبطال، نيالكُن..

جوني مخيبر

(يوميات مسعف) ” ٣ أغلاط “

صرلي ٦ سنين متطوع بالصليب الأحمر اللبناني،
٦ سنين تعلّمت إفهم وجع الناس وما فرجي وجعي عَ وَجعُن، يعني بالمُختصر صرت أعرف إسحب من لحظة وَجَعُن نتفة وقت كِبّ نكتة وضَحِكُن وإترُك بصمة حلوة بعد كل مهمة.

٦ سنين مفكّر حالي صرت مخضرم مع الوجع، يعني متل ما بيقولوا بمزَح معو وبِضحَك عليه.

وفجأة اليوم، كانت أول مرّة بزور مركز سرطان الأبطال مش الأطفال، وبالرغم من إنّو إلي ٦ سنين، عمِلت ٣ أغلاط.

أول غلطة إنو حسّيت بالشفقة لمّا شفِت بَطَل صغير، وهو أساساً مش طالب هالشي، البطولة اللي عايشا مش ناطرة ربحا جميلة بشوية إحساس ضعيف.

تاني غلطة، قرّبت لَعِندو وهو واقف عالحفّة وبدو ينُطّ، مديتلو إيديي تَساعدو يِنزَل وما يوقَع، قلّي” زيح، بعرف نُطّ”، ليك أنا بشو بالي، شو إنّي سخيف وهو ما أقواه.

تالت غلطة عمِلتا، فلّيت مقهور، مع إنو اللي عِشتو هونيك كان مليان أمل، يعني من الآخر عيب عليي إزعل…

لكِل أهل بَطَل من هالأبطال،
نيالكُن
نيال قلوبكُن ❤️

جوني مخيبر

CCCL

ملاحظة: الصورة من الإنترنت

‫شاهد أيضًا‬

بهذه الكلمات هنّأ البطريرك ساكو المسلمين بحلول شهر رمضان!

وجّه بطريرك بابل للكلدان الكاردينال لويس روفائيل ساكو التّهنئة إلى المسلمين بحلول شهر رمضا…