مايو 4, 2021

ليا و باتريسيا ما قِبْلوا إنو تكون السواقة حكر ع الرجال

جوني مخيبر

(يوميات مسعف) ” الله يحميكُن ”

من اليمين ” ليا ” ومن الشمال ” باتريسيا “.

مسعفتين من دورات مختلفة، بس من مركز واحد، جبيل.

إخوات رجال، وبنفس الوقت كتير أنوثة.

ما قِبْلوا إنو تكون السواقة حكر ع الرجال، أصلاً شو الفرق؟ ما كل وحدة منن قد ١٠ زِلِم.

هنّي قِبْلوا يِتحَمّلو مسؤولية سيارة وEquipe، وما خافوا من شي، أصلاً ما في شي بِخَوّف، يلي تعَوّد يحمُل مسؤولية مريض بجدارة، هينّة عليه مسؤولية سيارة.

بس تشوف السيارة مارقة وهنّي جواتا، بيِكبَر قلبَك، لأنن بيرفعوا الراس.

اليوم هالبطلتين عم يتمرّنوا تيصيروا يسوقوا رسمياً سيارة الإسعاف، وقَرّبوا كتير من هاللحظة.

الصليب الأحمر اللي علّمنا نساعد الناس، ما كان عارف إنو عم يعَلّمنا نساعِد حالنا، ندَعوِس عالخوف، نقِلو فِلّ.

علّمنا نسَكّر قصةّ، ونفتَح قصّة وتحدّي جداد، ويلي بيِتحدّى حالو بإيمان بيِربَحا.

كتار اللي متل ليا و باتريسيا، في كتير مراكز عندن متلنا أبطال، نحنا منفتخر فيكن، وبكل تضحية عم تقَدموها.

انشالله دايماً لقدّام..
الله يحميكُن ❤️

‫شاهد أيضًا‬

سيّدة النّجاة- زحلة تحيي عيد رقاد السّيّدة وانتقالها بالنّفس والجسد إلى السّماء

في زمن عيد رقاد السّيّدة وانتقالها بالنّفس والجسد إلى السّماء من 1 إلى 15 آب/ أغسطس، تقيم …