ألكسندرا خَبْري الله عن كل شي

( ٤ آب) ” خَبْري الله ”

ألكسندرا نجّار، هي اللي إجا الموت عَ نُصّ بَيتا، عَ هالحَقلة الصغيرة وقَطَف وردة حلوة كتير وطار فيا.

حدا بيَعرِف إنو حتّى التراب بس تجرّب تقطف منو وردة، بيِتكَمَش فيا تَيِمنَعَك؟ وأوقات ما بتِقدِر عليه.

نيالو التراب بيِقدِر، بس الإنسان لاء، لأنو الموت بيِجي بسِرعة كتير، وبسرعة أكبر بِفِلّ، ما منلحِق ناخد ونعطي مَعو، ما فيك تِستأنف، ما فيك تقِلّو يا زلمي روق خليني إقنَعَك، ما فيك تشيل الكَف وتخبطو ياه تَتِمنَعو يوَجعَك.

حتّى بأكتَر مطرح آمن، الموت بيَعرِف يوصَلّك.. .
ألكسندرا كانت بالبيت، بالأوضة، ما بتعرف شو يعني مرفأ وعنبر، ولا بتفهم بالنار والدخنة..

كانت بالبيت عم تِرسُم لبنان وتلَوّن السما، كانت بالبيت عم ترسم عيلة مبسوطة، كانت بالبيت وبرّا في لبنان بِشِع عم يِنرَسَم، وسما سودا. برّا كان في قلم رصاص جايي يخَرطِش على رسمة أكسندرا، وبدل المبسوطة يِكتُب مقهورة.

وفجأة، فَلّت ألكسندرا وضَلّت الرسمة تحت الركام، بين الغبرة والوجع، رسمة رغم كل شي بشاعة بدا تعطينا أمل.
فَلّت ألكسندرا وفَلّ لبنان وما عاد يعرِف يِرجَع…

خَبْري الله عن كل شي
وإنتي وفوق ما توَقفي تِرِسمي..❤️

#٤_آب

جوني مخيبر