أنا خايِف يا امّي، ما تفلي!

ماريلين صليبي: الصلاة والصوم...

إمي…

وين رايحة؟

رح تتركيني هون وحدي؟

أنا مصقَع ع هالخشبات، أنا خايِف، ما تفلي!

يا ريت بعرف إحكي تأُصرخ وقلك رجعي…

بوعدِك ما عذبِك…

ما بدي إتعلم، ما بدي ألعاب ولا تياب، صدقيني ما رح يكلفِك مصروفي شي، بس دخيلك ما تفلي…

شو بدك بعملِك، بس غمريني عصُدرك وشدّي، خليني حسّ بدقات قلبِك، خليني غمِض عيوني ونام بسلام…

إمي..

عم تحرقيلي قلبي.

ردي عليي…

كيف فيكي تعيشي بهالذَنب؟

كيف قدرتي تغَلطي مع الشخص ل مفروض كون من لحمو ودمو، وليش هيك عم تصلحوا غلطتكن..

الله يسامحكن.

أنا رح كون منيح، وبعد كَم سنة بس، رح إكبر وكلما إتذَكَركُن، رح صليلكُن ومتل ما الله ما تركني اليوم، ما رح يتركني بهالدني..

رح ياخدلي حقي فوق، بعدالة السما…

انتبهي ع حالِك…