الأب هاني طوق: انا مش اكتر من غبرة بالهكون

Screenshot 20210105 232006 Facebook

Screenshot 20210105 232006 Facebook

ببداية هالسنة برجع بنشر شي كتبتو سابقا وبزيد علي وبعدني مآمن فيه لاخر عمري :

الخوري من ريحة الناس يللي بيخدمون ، بيفرح بفرحون وبيزعل بزعلون، وبناضل معون لمجتمع افضل وكرامة الانسان والتنمية والعدالة.

الخوري يللي بيوقف على جنب بضل على جنب وعلى هامش وجع والم وفرح الناس.

بالصلاة معون، بالزرع معون، بالسلم معون،بالحرب معون، بالحصاد معون، بالمنافسة معون ، بروح الاخوة والسلام ومحبة كل شخص بشخصو معون، بالانتقاد معون، وبحرية الراي معون، ومستعد متل معلمي انصلب عنون.

المهم يضلوا مناح، ويتنافسوا عل الخير، ويكونوا شهود لقيام دولة حقيقية بتحترم الانسان، خالية من الفساد والمحسوبية والتطرف والتكفير، مُحبة للبيئة والنظام والعدالة.

انا متل كل واحد منكون عندي هم عيلتي ومجتمعنا ومستقبلنا وولادنا وارضنا وعلاقاتنا الحلوة والندية مع كل عيل وطنا ، مشان هيك بالنسبة الي الحب ما بيعرف حدود، وما بيعرف يقعد على جنب وما بيقدر الا ما يشارك . الحب بيعدي متل الكره . عم بتعلم يوم بعد يوم انو حب اكتر واكتر على امل اوصل شي نهار على مثال معلمي اتعلق على الصليب دفاعا عن الحق والحقيقة وكرامة شعبنا.

كتير اشيا فشلت فيا، ونجحت بكتيير مطارح، وعشت كمية الم لا توصف ونزل من عنيي كمية دموع بتسقي جنينة، وبالوقت نفسو عشت كمية فرح وسعادة اكتر من رائعة والحياة مكملة.

انا مش اكتر من غبرة بالهكون.

بحمل كفني على كتفي كل يوم ، وكل يوم بيعطيني ياه الرب هو ربح وفرصة جديدة لحتى اتعرف عليه اكتر ومن خلالو عل كل هالخليقة.
الوقت هو الوعي، والوعي بيصنع الوقت، وبيصنع الشغف والحب والاحلام والاهداف.

انشالله منضل مليانين وعي تا انضل مليانيين حب وشغف وارادة واحلام.

هالسنة وكل سنة وكل الزمن يكون مبارك عليي وعليكون. امين.