بقلم الاعلامية لارا نون: رسالة من إبنو لعلاء ابو فخر…

بقلم الاعلامية لارا نون: رسالة من إبنو لعلاء ابو فخر…

رسالة من إبنو لعلاء ابو فخر…

بعرِف يا بابا… إنك حمِلتني تروح معك عالطريق… طالب بحقي لأنو البراد فاضي… وقسط المدرسة تقيل عليك…

بعرِف إنك حامل همي… وما بدك ياني إكبر وغيب عن عيونك وهاجر…

بعرِف إنك إيام بتنسى حالَك وزوادتك عالطاولة… راكض تأمنلي مصروفي أنا وإخواتي…

بعرِف إنك إيام بتبكي عالسكت… خايف إذا المصروف رح يضل يكفينا لآخر الشهر…

بعرِف إنو الكرامة عندك بتسوى الدني… وما بقي إلا الطريق لتصرخ فيها باسم الكرامة…

بعرف إنو كنت ناطر صوت الفرقيع لننتصر ببلد بيشبهنا… ما بيشبهن هني…

بس ما كنت عارف يا بيي إنو عهالطريق… رح تعمل حالك ميت…

متل ما كنا نلعب أنا وياك… وهالمرة… ما تقوم…

ما كنت عارف إنو الفرقيع… إسمو رصاص… وإنو دمك يلي هوي دمي أنا سايل عالطريق…

ما كنت عارف إنك رح تسبقني وتهاجر قبلي… وما ترجع…

ما كنت عارف إنو إمي رح تغمضلي عيوني… عن وطن ما بيساع بيي… ما بيساع الكرامة…

ما كنت عارف إنو إمي رح تغمضلي عيوني… عن وطن يَتَّمني… لأنو هيدا وطن يتيم…

بابا… إنت ورايح… ما تنسى تبوسني… رح ضب شنطتي وشنطتك… صورتي وصورتك… وهونيك ببلاد الدني… إذا حدا سألني انت مين

رح قلّو أنا إبن علاء… وإذا سألني انت من وين… رح فرجيه خريطة دمَك عالأرض… لأنك إنتَ الوطن يا بيي… إنت الوطن!

بشوفك بخير…