نوفمبر 27, 2020

قرب عيد الميلاد… قولكن يلي ماتوا بالانفجار بردانين؟ قولكن يلي هاجروا راجعين؟

AFP or licensors 1

قرب عيد الميلاد، الشجرة نفسا، المغارة نفسا، الناس مش نفسا…

قرب عيد الميلاد… وفي شجر رح تبقى مضبوبة… ممنوع تلمع ممنوع تفرح لأنو في عيون عم تدمع…

قرب عيد الميلاد… والعيلة يلي بتشبه عيلة المغارة فقدت طفل صغير بمرض، بحادث، بانفجار، قضاء وقدر… فقدت ابن سموا شهيد… وبحادث سيارة سموا فقيد…

قرب عيد الميلاد… والعيلة يلي بتشبه عيلة المغارة صارت بمأوى… ختيارية معن بلشت الحكاية… ووحدن بغصة عاشوا النهاية…
قرب عيد الميلاد… واليتيم رح يحضر عشا ببيتو… عالطاولة رح يحط 4 صحون… يمكن يدق بابو زوار… يمكن مريم ويوسف ويسوع يشاركوه بالعيد…

قرب عيد الميلاد… وجرس نص ليل رح يدق… والمريض يلي بالمستشفى رح يشوف شريط حياتو مع كل دقة…

قرب عيد الميلاد… والمغترب بقلبو غصة… حنين للعيلة المجموعة… لدفا البيت… للنومة فوق بعض بغرفة وحدة للحب الحقيقي يلي معبا الدني…

قرب عيد الميلاد… الدني برد… قولكن يلي منحبن تحت التراب بردانين؟ قولكن يلي تركونا راجعين؟ قولكن يلي منحبن باقيين؟ قولكن نحنا اليوم هون وبكرا مهاجرين؟ قولكن يلي صاروا فوق بالسما فينا فرحانين؟

قرب عيد الميلاد… شجر عالارض مضوايين ومزينين… بشر عالارض مدري شو مخبايتلن السنين… وبشر تحت الارض بهالعيد بيزيدوا الوجع والانين…

‫شاهد أيضًا‬

في خميس الأسرار…

تيلي لوميار – نورسات – مارلين صليبي هو خميس الأسرار المبارك الذي نتأمّل فيه كم…