ديسمبر 19, 2020

هيدي اول سنة بحِس بالعيد. كلنا فقراء، كلنا عنا أوجاع ، كلنا مسروقين…

التزام الآباء الساليزيان في مساعدة المتضررين من انفجار مرفأ بيروت

هيدي اول سنة بحِس بالعيد…

كلنا فقراء… كلنا عنا أوجاع… كلنا مسروقين…

هيدي أول سنة بحس إنو مجبورين نلاقي الفرح “بالموجود”…

بالتياب الموجودة بالخزانة وفينا نمَشّي الحال فيها…

بالألعاب يلّي ضابّينا من قبل… أو نقنع ولادنا بهدية وحدة…

هيدي أول سنة بحس إنو المسيح رح يولد بمغارة…

وإنو كلنا خايفين عأهلنا وعالتيتا وجِدّو من كورونا وعم نعمل كل شي في احتياطات لنشوفن ليلة العيد… اشتقنالن…

هيدي أول سنة بحِس إنو لازم ننزل عالطرقات نرتِّل تراتيل الميلاد…

ونحمل صواني المِغلي وندق بواب بيوت ما منعرفا…

أول سنة بحِس لازم ننزل عالمرفأ ونرتل بصوت واحد “ليلة الميلاد”…

ونعمل قداس هونيك تحت الشتي… ويجي بابا نويل لابس بدلة الدفاع المدني…
هيدي اول سنة بحس إنو رح نخلق من الضعف قوة… ببيوتنا البردانة… بيوتنا يلي بعد ما شِفيِت من وجع الفقر والدمار…

هيدي اول سنة بحس بالميلاد… لما سكتت كل أضواء الأرض…

واختفت كل البهرجات… وما بقي غير نجمة مضواية فوق بالسما تدِلنا عطريق الخلاص…

“مورانتاه… تعا يسوع… ملّي الدني بمجد السما”…

‫شاهد أيضًا‬

بطاركة ورؤساء كنائس القدس يجدّدون النداء من أجل السلام في الأرض المقدّسة

بطاركة ورؤساء كنائس القدس يجدّدون النداء من أجل السلام في الأرض المقدّسة | Abouna جدّد الب…