لمن شافت موظفة البنك العملة اللبنانية، كشّت بوجي وقالتلي بكل جديّة:”ما مناخد لبناني…” هيك صار مع الأبونا كامل

مبارح كان أول الاسبوع، رحت عالبنك تإدفع سند استحق عليّ، ومتل العادي كنت حامل عملتي الوطنية، متل أيا مواطن بالعالم بيتعامل بالنقد البلدي. لمن شافت الموظفة العملة اللبنانية، كشّت وقالتلي بكل جديّة واختصار:”ما مناخد لبناني…” اتطلّعت فيها منيح فكرتها عم تمزح، لكن كشّت أكتر وما هما تشرحلي أكتر…
فكرت بلكي أنا غلطان وانتقلت بالزمن ع شي بلد تاني غير لبنان، لكن البنت بتحكي لبناني والشارع برا بجبيل، والناس بتحكي لبناني، يعني أنا بلبنان…. ع فوءا هيدي مش أول مرة بدفع السند بالليرة الشهر الماضي دفعت والبنك ذاتو، قلتلها ما معي دولار، قالت بدك تروح تصرف برّا… هون تأكدت إنو القصة جديّة البنت ما عم تمزح، وأنا ما رح إمزح. قلتلها مجبورة بحسب القانون تقبضي باللبناني، لأنو انت بلبنان ومجتمع مدفوعات الليرة اللبنانية هوي النطاق الجغرافي للدولة اللبنانية…ما جاوبت، قامت بسرعة وفاتت لعند المدير وبعد شي دقيقتين وصل المدير، شب مهيوب وطويل ومبين إنو رياضي، قللي مسيو مش عارف انو في تدبير إداري بالمصارف ما بياخدو لبناني لدفع سندات الدولار؟ قلتلو: لا  مش عارف، بس هيدا التدبير طالع من مصرف لبنان، قللي لأ، بس ماشي بين المصارف ع الألوو… قلتلو بس انت بتعرف انو هيدا مخالف للقانون وما الك حق ترفض العملة اللبنانية، قللي مظبوط بس ما بقدر اعمل شي، وكل المصارف بيعملوا هيك، وسمّالي المصرف الفلاني اللي هوي زبون عندو، قلتللو ما بدفع الا باللبناني، صرف دولار بالسعر الرسمي واعطيني السند، أو فرجيني مذكرة مصرف لبنان… قللي لمرة وحدة تكرم عينك، انت معك حق بس هيدا الواقع المصارف ما بدها تخلا من الدولار.قلتللو بس هيدا اسمو إنهيار لعملة البلد وإهانة لابن البلد بقلب البلد… قللي مسيوو عن أي بلد عم تحكي ليش بعد في بلد؟؟؟!!!
دفعت السند باللبناني ورحت بطريقي أسأل حالي أنا بأيّا بلد وعن جدّ بعد في بلد؟؟
إهانة ابن البلد بالكهرباء، بعز دين الحرب كان في كهربا وهلق لأ… شو بدنا نقول لصباح وغنيتها نورتونا يا حبايب طفو نور الكهربا الهيئة كترو الحبايب…
إهانة ابن البلد بالمي، ولبنان أغنى بلد بالشرق كلو بالمي، والمي مقطوعة يا أفندي…
إهانة ابن البلد بالشغل، شغل في بس مش لابن البلد…
إهانة ابن البلد، بالتعليم، تعليم في بس مش قدرة ابن البلد…
إهانة ابن البلد بالصحة، صحة في بس أكبر مجرور بلبنان يللي هوي نهر الليطاني عم يهدد صحة ابن البلد…
إهانة ابن البلد بالبيئة، بيئتو حلوة بس الزبالة حرقت سلاّف ابن البلد…
إهانة ابن البلد عالطرقات، قانون سير في بس ما بيطبق بالبلد…
إهانة ابن البلد بهويتو، هوية في بس هالهوية ما بتمشي بأيا بلد…
إهانة ابن البلد بمستقبلو، مستقبل في بس مش بهيدا البلد…
إهانة ابن البلد بوطنو، وطن في بس…. خليها بالقلب تجرح

الخوري كامل كامل

‫شاهد أيضًا‬

“برج خليفة” بألوان العلم السريلانكي…

تضامن برج خليفة في الإمارات، أطول برج في العالم، مع ضحايا التفجيرات التي استهدفت كنائ…