انت بتريد الخير لغيرك وغيرك دايماً بيردلك الشر، رغم كل شي خليك فاعل خير وهوي يتهنى بشرّو

انت بتريد الخير لغيرك وغيرك دايماً بيردلك الشر، رغم كل شي خليك فاعل خير وهوي يتهنى بشرّو…
إنت قلبك طيب وبتشوف كل الناس بكل مناسبة خير وبركة وهني قاعدين جلِد فيك بكل مناسبة، رغم كل شي قلبك الطيب رح ينتصر بكل مناسبة…
إنت لسانك دافي وبتدافع عن الغايب والحاضر، عن الكبير والزغير، عن المهمش والمعتر… وهني لساناتن عليك متل الافاعي!!! رغم كل شي لسانك خلي دافي وأكيد رح  يدوّب ناس كتار  قلوبن مجلدة وعقولن محجرة …
إنت بتضوي وهني بيطفوا، إنت بتعمر وهني بيهدموا، إنت بتجمع وهني بيفرقوا… رغم كل شي شمعة زغيرة بتكسر عتمة كبيرة وخيمة فيها حب أدفى من قصر مليان حقد، وغمرة حب أقوى من شر العالم كلو…
إنت متواضع وغيرك متكبر، إنت بتبارك وغيرك بيلعن، إنت بتشجع وغيرك ببعرقل… رغم كل شي خليك متل ما إنت، لانو المتواضع بعمرو ما بيخسر، واللي بيبارك بعمرو ما بينقص، واللي بيشجع غيرو بعمرو ما بيموت…
إنت أمين وغيرك بيغش، إنت بتحب وغيرك بيغار، إنت بتفرّح وغيرك بيحزّن… رغم كل شي قول يا رب وكفي مسيرتك، رغم الخيانة كفي مسيرتك، رغم الغيرة القاتلة كفي مسيرتك، رغم كل وجوه الحزن كفي مسيرتك… لأنو بالآخر نصرك أكيد.

الخوري كامل كامل

‫شاهد أيضًا‬

قاعد، ساكِت، وصورتَك قبالي

تأمّل حواريّ قاعد، ساكِت، وصورتَك قبالي، ما في حَكي، وَحْدا النظرات كانت سيّدة المَوقَف، ي…