كيف عم نستعد للصوم؟

BonheurDuCiel Media

“أتريد أن تصل صلاتك إلى السماء إمنحها جناحين الصوم والصدقة”
(القديس أغسطينوس).
كونوا أنتم مستعدين لأن إبن الإنسان يأتي في ساعة لا تخالونها. كيف عم نستعد للصوم؟
هل الأولوية بحياتنا ليسوع؟
هل الأولوية بحياتنا للكنيسة؟
هل الأولوية بحياتنا نكون قديسين؟
التلميذ الاولوية بحياته إنه يكون الاول بصفه.
التلميذ الاولوية التخرج من أفخم الأماكن.
الجامعي أفضل شهادة ومن جامعة مرموقة.
الأولوية للأهل يشتغلوا ليل نهار تيغيروا البيت أو السيارة.
وين يسوع من كل هالأمور؟
الإثنين اول يوم من الصيام ،والصليب رح ينرسم عجباهنا وبقول انا صايم.
هل انا جاهز او مستعد للصوم وشو هوي الصوم؟
إذا بتأمل بإنجيل الشاب الغني “بع ما تملك وتصدق به على الفقراء”
بس شو عمل الغني ما رد عا يسوع برم ضهره وكفى طريقه وأكيد هوي حافظ الإنجيل كله متلنا نحنا حافظين الإنجيل والترانيم…..وبس نسمع كلام يسوع “إذهب وصالح أخاك ثم عد وقدم قربانك “بقول صعبة ،انا بدي وطي من حالي وصالحه،انا بسامحه بس أنا بطريق وهوي بطريق…
أو بقول كيف بدي صالحه منه من حزبي ولا ديني ولا من بلدي؟
يسوع قلنا”سمعتم انه قيل أحبب قريبك وابغض عدوك اما انا فأقول أحبوا أعدائكم “
وين يسوع من محبتكم؟
الإنجيل بقلنا “حيث يكون كنزكم هناك يكون قلبكم “وين كنزنا اليوم؟
كنزنا هوي الprestige ,المظاهر قاتلتنا كل همنا شو بدن يقولوا الناس عنا ،مش شو بدو يقول يسوع…
الطوباوي يعقوب بيقول :”الصليب مرايتكن”الصليب المغموس بالشوك والدم..
نعمة الله الحرديني بيقول:”الشاطر بيخلص نفسه”.
“متى جاء سيدهم أيجدهم متيقظين؟”
هل يا ترى انا خادم أمين؟
كيف بدي صوم وضميري نايم؟
ما بقرف من خطيتي؟
ما بيعذبني ضميري؟
ما بخجل ؟بدعس عل الكل تأوصل لمركز أعلى بالوظيفة؟
كيف بقدر نام وضميري مليان بالغش وبالفساد؟
ويني من الصوم؟
شو عملت بالصوم ؟
خميس تذكار الموتى صارخميس السكارى…وما في عيد إلا ما حولناه لزينة،واكل وثياب جديدة…وبالعيد كتار بيجوا سكرانين عالكنيسة ومطفيين وما منسمع وعظة الأبونا:
الكنيسة إم،إم بتخاف عا ولادها،بتوصين يلتزموا بتعاليمها ودايما رؤسائنا الروحيين بيبعتوا رسائل للمؤمنين بذكرون بمعنى الصوم….
حابب إتواصل معكن عن موضوع الزواج المدني المتفشي عبر وسائل التواصل الإجتماعي:
بدي إسألكن :
لي بتاخدوا يللي بدكن اياه من أسرار الكنيسة؟
يا باخد كل الأسرار او ولا سر؟
لي بدي عمد إبني بالكنيسة وانا زواجي مدني؟
لي انا بدي إندفن بالكنيسة وانا زواجي مدني؟
لي انا ببعت ورا الابونا تيمشح المريض؟
يا بتزوج بالكنيسة وبطيع كل الأسرار يا بلاها….
زواجك المدني خطية كبيرة وتناولك القربان خطية مميته.

صلاتنا على نية المسؤولين يللي عم يتفلسفوا على الرب وعلى تعاليم الكنيسة من اجل مصالحن الخاصة.
صلاتنا على نية المسؤولين يللي سمحوا بزواج المثليين.
صلاتنا على نية المسؤولين يللي سمحوا بالموت الرحيم.
صلاتنا على نية المسؤولين يللي سمحوا بإنجاب طفل الأنبوب.
صلاتنا على نية المسؤولين يللي سمحوا بالإجهاض.
صلاتنا على نية المسؤولين يللي سمحوا بالمخدرات.
المسؤولين عن هالأعمال هني ضد مشيئة الله وعم بيهينوا كرامة وحب الإنسان،ونحنا عندن ارقام….
بس نحنا ولاد الله يللي تجسد بأحقر مطرح بمذود البهايم وإجا تيرفع الإنسان ويكون على مثاله،وما حدا بالكون حبنا متل يسوع وما حدا بيخاف وبيعتل همنا قد يسوع…
يسوع إجا تيكون خادم ومش ملك علينا،عاش بيناتنا وحبنا متل ما نحنا وكل همه خلاصنا.
إسمعوا منيح وما تكونوا الإثنين متل المرائين ، الصليب عاجبينكن،غسلوا وجهكن ودهنوا شعركن…
إذا صمت وصليت من دون أعمال رحمة وتقشف كأنك ما صمت،بالصوم بدك تضحي…ولاممكن تشفى من جروحاتك وتقطع من ضيقتك من دون ما تحمل صليبك.
الصوم والصلاة هني طريقة عيش…
عندي شوق وحب للصوم والصلاة ومش واجب،وكل ما بصلي وبصوم بكون مع الله،في احلى من إني كون مع حبيبي؟ومين حبني متل الله؟ وكل ما حبيت بكون مع الله والله بكون معي..
الصوم مش بس للساعة ١٢ الضهر ،وبعد الساعة ١٢ اركيلة ودخان وسهر واكل من دون شبع وأطيب المأكولات؟
الصوم بعمل إماتة وبقدم كل يوم مبلغ يمكن لجاري ،خيي او لأي محتاج بلتقي فيه…
صومي بقدموا بفرح للرب وبالتوبة والإعتراف….
إذا صمت :
سامح خييك ٧٠ مرة ٧ مرات. -تقبٌل خييك متل ما هوي وحبه من دون شروط. إحترم الآخر متل ما هوي.
اغفر وسامح. اعزم فقير على مشوار او غداء ومش قريبك وهيك بتتعرف على يسوع.
بالصوم بدي إتخلى عن إشياء كتيرة..
التخلي هوي إنتصار على الأنانية،على الشيطان.وتا إقدر إلتزم لازم إتواصل بعلاقة متينة مع الله.
وصيتي بالصوم :حبوا صليبكن وما تتذمروا.ما ترفضوا وتقولوا صليبي كبير….
الصليب هوي بوابة الصوم.
الصليب هوي عبور صوب القيامة.
الصليب هوي قيامة وإنتصار.
الصليب visa بتقطعها على الأرض وبتوصلك عالسما …
رح إحمل الصليب وإتبعك…..

للتبرّع لصالح جمعية سعادة السماء – موقع الجمعية الرسمي

‫شاهد أيضًا‬

بالفيديو: من لبنان بلد الرسالة ،الأب مجدي العلاوي ومبادرة صناع الأمل – الإمارات العربية المتحدة

من لبنان بلد الرسالة ،الأب مجدي العلاوي كاهن الطريق وخادم جمعية سعادة السماء مرشح لان يكون…