أخبار جمعية سعادة السما - ‫‫‫‏‫4 أسابيع مضت‬

الأب مجدي العلّاوي: بترجاكن، اعملوا فرق، مؤسساتنا التربوية بحاجة لرحمة وحب…

الأب مجدي العلّاوي

لما ابني يكون عندو مشكلة وقصّر بمطرح معيّن… بينحط برّا

لما بنتي تعاني من مشكلة وهالمشكلة أثّرت على سلوكها… بتنحط برا

لما إبني شي نهار ما يكون مركّز؟ منعَيّروا… ما مناخدو على جنب نسألو شو صار معك مبارح؟ بالبيت… بالملعب…

لما إبني يكون كسلان… بتطلع المدرسة للشاطرين… ولليافطات يلّي بدا تتعلق برا ١٠٠% نجاح… وبينكب ابني برا…؟

لما ابني يقول كلمة بلا تهذيب… بيصيروا أهلو بلا تهذيب…؟ إمو وبيّو بلا تهذيب…؟ وسليلتو بلا تهذيب…؟ وبيحمل وصمة قلة التهذيب كل السنة الدراسية…؟

لما ابني يروح معو tartine وِحدة مش تنين… وعلى تاني فرصة يبقى بلا أكل… لأنو ما في أكل كافي بالبيت… وولا مرة بينسأل ليه ما أكلت؟

لما حذاء بنتي ملزّق بالتلزيق وأصحابا عم يعيّروها بالصف والمدرسة كل همّا نأمن القسط والباقي تفاصيل بلا طعمة.

لما كل هالوجع عم بيصير بحرم هيكل تأسس للرسالة… بِسأل حالي:

أنا وين؟

الرسالة وين؟

ولادي وين؟

وطني وين؟

دولتي وين؟

يا عالم ارحمونا وارحموا ولادنا…

ما إلكن فضل إذا ما وقفتو حد الكسلان… والمنبوذ… والمحروم… والجوعان…

ما إلكن فضل عالشاطر والمرتاح والغني…

شو حابب إسمع شي مرة إنو مدرسة من هالمدارس عِملت فرق بحياة تلميذ…

نعم، إيه هي مدارس الحكمة، معاهد و جامعات الحكمة، إي هي مع صاحب السيادة بول عبد الساتر، أبونا شربل، المدير جورج و جميع الأساتذة، شكراً و عقبال ما نتعلم كلنا منه الحكمة لحتى نكون واحد، إثنين، ثلاثة مثل صاحب السيادة بول عبد الساتر.

بترجاكن، اعملوا فرق، مؤسساتنا بحاجة لرحمة وحب… ارحموا وحِبّو… وشوفو إنو ربنا ما بيترككن وما بيترك حدا…

ملاحظة: كما ساهمت جمعية سعادة السماء لعام الدراسي 2018-2019 بدفع أقساط مدرسية 415,000$+52,000$+22,400$+ LBP 29,000000 لطلاب لبنانيين في مدارس خاصة.

الأب مجدي علاوي خادم جمعية سعادة السماء

‫شاهد أيضًا‬

الأب مجدي العلّاوي: صلّوا المسبحة، بصلاتكن العدرا رح تتدخل وتطلب من إبنها يسكب أمطار نعمه على الأرض

لبنان يحترق وسماء لبنان يغمرها الدخان فمن المسؤول؟ كل واحد منا مسؤول … كل ما بترمي ورقة بت…