نيالك عرفت ترسم الطريق: إنت لمسة الله المباركة على الأرض
نيالك، عرفت ترسم الطريق اللي بيوصّل ع الملكوت، وتترك على الأرض بصمات من عجايب الله يللي كتَبت مجد اسمو بالزيت، والماي، والدم، والبخور…
شربل صرت المُرشد، والمعلّم، صرت البيّ والخَيّ، صرت بعقولنا وقلوبنا الصديق الدايم والحيّ.
كلماتي بتعجز قدام عظمة قداستك، وقوّة خصورك، بس يمكن أبسط الكلمات هيي أصدقها.
شربل إنت حالة، إنت ظاهرة،إنت لمسة الله المباركة على الأرض. إنتَ قطعة من قلبو، جزء من حنانو، شقفة من رحمتو.
نيّالك قدِرت توصل على النبع وتشرب منّو.
نيّالك عرفت تِسكَر منّو وتفيض على العالم نِعَم من محبّتو.
شربل، يا رفيق الدرب، ما تترك حدا، ولا تخيّب حدا.
شربل يا حبيب القلب، عبّي جرارنا، مَلّي قلوبنا، صون بيوتنا، واحفَظ عيالنا، بارك أطفالنا، واحمي شبابنا.
زنّرنا بزنّار قداستك، قوّينا بذخيرة إيمانك.
يا شربل ما تفارقنا، يا شربل، ضلّك معنا.
يا شربل ساعدنا، يا شربل احمينا، احمينا !!!
إقرأ هذا المقال:
برنامج الزّيارة الرّسوليّة لقداسة البابا لاوُن الرَّابع عشر إلى تُركيّا ولبنان
برنامج الزّيارة الرّسوليّة لقداسة البابا لاوُن الرَّابع عشر إلى تُركيّا ولبنان يقوم قداسة …
