عم تدوّر عالحب؟

أصعب شي بالنسبة للي عم يحب،
انو ما يلاقي الحب عم يرجعلو..
صعب كتير نزرع بحياة الناس،
بعدين نرجع نبلش مع غير ناس من الصفر..

وانت؟
عم تدوّر عالحب؟
عم تحس إنك عم تعطيه، وما عم يرجعلك؟
خايف تِفضى؟
خايف تطوي نهار جديد، وإنتا بمحلك..
رح خبرك شي؛
مزبوط إنتا بمحلك، بس فكر شوي بعد..
حبّك غيّر ناس كتير..
كنت جاهز تتحب، وقت هني كانو بحاجة للحب..
إنتا بمحلك، بس هني بغير محل، بفضل حبك..
إي.. إنتا بطل..
بدك تعرف إنتا مين؟
تطلع، بفضلك، هني مين ..
بدك تعرف إنتا وين؟
تطلع عاللي حبيتن، وشوف هني وين..
إي… هلقد إنتا بطل..
هيدا قصة الشخص اللي بحب..
ما عندو قصة..
بس موجود بقصص كتار..
هيدي قصتو،
ولا مرة رح يلاقي الحب اللي ناطر،
رح يلاقي بس… الحب اللي هوي عطاه
هني نسيو.. وبيجوز لازم نحنا ننسى،
بس عالأكيد، الله مستحيل ينسى