يمكن تقولوا هول مش أولادك من لحمك و دمّك بس انا بقلكن هودي أولادي بالروح و يسوع موصاني فيهم

من شهر و أكتر اذا حدا كان يسألني عندك أولاد…  كنت قول ايه الحمدالله عندي صبي و السؤال المعتاد ليه تاركتيه وحيد حرام ما يكون عنده أخوة..

كان هيدا السؤال يضايقني كتير لأنه الظروف بكتير مطارح هيي اللي بتصير تتحكم بحياتك و بتاخدك على مطارح كنت تجرب تهرب منها…

هيدا السؤال كان يحسسني بغربة المستقبل و أنه ابني وحيد و ما عنده حدا يرافقه بهالعمر.

لحد ما بشهر واحد تغيرت المعادلة… و بدل الولد صار عندي أربعة…

يمكن تقولوا هول مش أولادك من لحمك و دمّك بس انا بقلكن هودي أولادي بالروح و يسوع موصاني فيهم.

أنا أخدت وعد قدام يسوع كعرّابة أني أهتم فيهم وكون حدهم وقت حاجتهم إلي ووجههم على محبة يسوع و ما أترك فرصة الا و ما كون حدهم فيها…

بشهر كبرت عيلتي و ابني صار عنده أخوة و انشالله بوقت الشدة بيكونوا سند لبعض و بيضلوا مجموعين بمحبة يسوع و بركته..

يمكن الحياة قست عليي بأشياء بس عوضتني بابني و فلاويني…

كلمة الأبونا رح تضل بأدني كل العمر لضل أعرف كبر المسؤولية اللي حملتها وقت اللي قللي نيالك يا بنتي شو عاملة لربك و قديه بيحبوكي ليأمنوكي على أولادهم..

انشالله دايما كون قد المسؤولية و اقدر كون حدهم دايما و ما خيب أمل الغوالي اللي أمنوني على أغلى شي بيملكوه اللي هني اولادهم و بقلكم اولادكم أولادي قدام الله و الناس و هيدا عهد أخدته قدام الله و ما برجع فيه…

الله يعطيني القوة لأقدر أوفي بوعدي و يعطيهم الأيام الحلوة و الأمان و الحب و انشالله يسوع بيضل مرافقهم بكل خطوة بيمشوها بهالحياة.