ديسمبر 7, 2020

ناطرك بفرح كبير، ورجا أكبر…

20201207 185507

ناطرك..
بفرح كبير، ورجا أكبر، رغم كل شي..
ناطر هيديك الليلة،
حتى إقعد بمغارتك الفقيرة، اللي فيها كل شي،
رح إقعد عالأرض حدّك..
عالقَش..
رح إتطلع فيك كتير،
بعدين رح خبرك..
فيه كتير خبار بقلبي..
سنة كانت صعبة عكل الناس..
فوضى، وفقر، وانفجار بيروت، ووباء..
من وين بدي بلش؟
بتعرف قديش شعبك بحاجتك؟
بتعرف قديش الناس ناطرينك؟
تعا،
جيب معك سلامك..
قول كلمتك..
خلي هالأمواج تهدا يا يسوع..
الناس تعبت..
بس ما يأسِت..
الناس تألمت كتير،
بس بدي خبرك شي، كلن بعدن عم يقولو إسمك..
توجعو كتير، ولكن صرخو إسمك بالعالي..
فيه ناس بِكيت كتير، وعيونا تعبت، بس عيونا بعدا صوبك..
خيبات أمل كتيرة وكبيرة،
ولكن فيه إنتا بعد..
وإنتا رح تضل أمل الكل، دايمًا..
غمور الحزنانين، وطمّنهن، وعزّيهن..
فيه ناس خسرت أحبابها، ومش عارفين كيف بدن يكفو..
بعدن مش مصدقين..
لموس قلوبن..
عطيهن راحة وثقة وساعدن يكفّو..
شباب قدامهن مستقبل، قوّيهن..
ناس خسرت كل تعبها.. عوّض عليهن..
الفقر عم يزور كتير عائلات، زور قلوبن وبيوتن، وملّيها من فرحك..
أرضك ناطرتك..
شعبك ناطرك..
تعا..
تعا يسوع

‫شاهد أيضًا‬

في خميس الأسرار…

تيلي لوميار – نورسات – مارلين صليبي هو خميس الأسرار المبارك الذي نتأمّل فيه كم…