“لازم نروح عالقداس الأحد، الله بيستاهل نعطيه ساعة من وقتنا”

Church l Pixabay

“لازم نروح عالقداس الأحد، الله بيستاهل نعطيه ساعة من وقتنا”..
كلمة منقولها دايمًا، ولكن مش مزبوطة أبدًا؛
لأن هالساعة إلنا، مش لربنا..
ولأن ربنا اللي بيعطينا زاتو، مش نحنا..
هالساعة بقضيها الله يخبرنا قديش حَبنا،
من وقت ترك السما ونزل تيكون حدنا،
لوقت نصلب وقدّم دمّو كرمالنا،
لوقت قام، ومن بعد ما طلع عالسما، ما قبل يتركنا وبقي معنا بقربانة بتنطرنا بكل قداس..
القداس هوي كلمة بحبك عم تتجدد من الله للإنسان بكل قداس..
إزا كنا حابين نغسل شوية خطايا، أيا وقت مناسب تنعمل هالشي أكتر من قداس الأحد؟
أيا مكان او وقت بيعطينا الفرصة تنعمل هالشي غير قداس الأحد؟
فيه ناس بيقولو عنا نهار واحد تنرتاح، نهار الاحد، كرمال هيك منفضل ننام شوي زيادة..
أي راحة بيعطينا ياها النوم بتخلص بس نوعا من النوم، ولكن أي راحة بتاخدا بالقداس رح تعيش معك كتير..
إزا كنت عم تطلب من الله القوة، وين بيقدر يعطيك ياها الا بالقداس؟
يالله قوم، شو ناطر؟ الله ناطرك مع كل القوة والحب اللي إنتا بحاجة إلن..
الصورة، من دير القديس بطرس للآباء البولُسيين (مرمريتا)
صورة بتعني كتير لكتار، ومن ضمنن أنا..
دير كل حجرة فيه بتشهد عكتر خير وحب قدمهن هالدير..
الله يحمي كل بيت وكل كنيسة ودير
الأب بيتر حنا